Q: 想問下西史應唔應該買雞精書😭😭😭
・
A: 首先，講多次係「世史」而唔係「西史」，因為你會學香港、中國同日本課題，換言之，唔係單單係學緊西方歷史，而係成個世界嘅歷史。依點讀中學果陣老師成日強調，結果依刻不自然有強迫症見到人講「西史」就觸動神經。
・
答返問題，買唔買雞精書好？乜嘢係雞精書？據啱啱行過商務拎咗本《最後一分鐘》望吓，裡面剩係得唔同課題嘅論點、少部分重要例子、或者有啲論據 － 有冇參考價值呢？唔可以話無，但養份就唔太高。
・
既然係咁，即係買唔買好啫？嗱，最近深明一個道理 － 一樣米養百樣人。有人睇雞精睇到5**，有人乜都唔做都5**，所以問題係到底發問同學仔你本身程度去到邊。要知依樣嘢唔難嘅，嘗試吓閂埋書答以吓問題：
・
1. 第二次世界大戰爆發有咩原因？
2. 寫論述題要扣冷戰結束有咩例子？
3. 要論證日本喺20世紀初政治現代化有咩論據？
4. 邊個係劉少奇？佢做咗啲咩？
5. 塞拉耶佛危機幾時發生？（〖注意〗依條某啲同學答唔到可以拉出去斬）
*答案將於文末公佈。
・
好啦，問題就答完啦，意義係咩？同學仔一分鐘內答哂而準確無誤嘅，好啦，雞精書唔啱你，做多幾條資料題或者論述題算啦好嗎；啱1-4題嘅，雞精書對你或者有啲用，所謂有啲真係有啲，切忌過份美化依件事；啱0題嘅，無錯啦，你應該收復雞精書，佢將會係你溫歷史嘅第一步，由淺入深，重新起步，明天會更好。
・
老實答世界上無必拎5**神技、睇咗就高分嘅書，最近深明「一樣米養百樣人」嘅道理。筆記？都係自己寫果本最好，至於點寫，碌返前幾個月嘅講過。當然啦，身為2018DSE考生，嚟到1月尾，仲寫咩鬼筆記，搵啲題目做吓操吓卷來得實際啦。
・
【答案】
a. 巴黎和會安排失當、極端主義、經濟大衰退、集體安全體系失敗、綏靖政策、列強未能充分合作；
b. 華沙公約組織解體、蘇聯解釋、經濟互助委員會解散、《中程導彈裁撤條約》、馬爾他首腦會議、《歐洲常規裁軍條約》；
c. 落實君主立憲、民選成份提高、政黨天治出現；
d. 前中共國家主席，任內批評毛澤東喺第二個五年計劃（或者稱為「大躍進」）係「三分天災，七分人禍」，迫使毛澤東退居二線，更甚埋下文化大革命爆發嘅伏線。當然，比較出名係佢推行咗調整政策，可以當係改革開放嘅前身。
e. 1914年6月28日。
コメント