Q: 可唔可以講下你當年係點溫his呢科
．
A: 可以呀～
．
關於溫書方法我比較主張「體驗式學習」。咩意思呢？簡單咁講就係不斷應用新學到嘅知識，就好似下列步驟︰
．
1. 先將課文內容睇一次
好強調係睇一次，而唔係背或抄。睇嘅意思係知道果個課題到底講緊咩、有咩論點、有咩史實等等。喺依個階段唔需要刻意迫自己記住，有個印象就可以啦～
．
2. 實戰
直接做練習係精髓。首先記住做咩練習都好，千奇唔好限時間。依家唔係考試測驗，亦都未去到溫熟書嘅地步，執著於爆發力訓練多數都兼顧唔到，得不償失。所以做練習唔怕做得慢，重質唔重量，做到自覺係最完整嘅作答為止。
．
3. 反思
你唔係機械人，不經思考而盲目做練習會影響溫習成效。做完練習後執迷於自己個分數或者本身答啱嘅地方無咩大意義，一方面今日拎高分或低分，唔代表下次基至考DSE果陣都係拎依個分，毛澤東話「一天等於二十年」，未到最後無人知結果，反而你依家每個決定就真真正正影響你日後嘅成績啦；另一方面，你本身識嘅嘢原則上係經得起時間考驗，咁就可以減輕練習帶嚟嘅負擔。
．
事實上，做完練習最緊要諗返自己邊啲地方做得未夠好，依點真係唔做練習係唔會知。再配合返前幾篇講過寫常犯錯誤嘅筆記，記錄自己錯過啲咩可以點樣改善。久而久之，你犯錯嘅機會愈嚟愈少，拎高分嘅機會就愈嚟愈高。更重要嘅係，考試唔係考你識幾多嘢，而係考你犯錯嘅次數。
．
透過做練習嚟溫書你仲可以獲得好多資訊︰
A. 考評局出題趨勢
B. 課題重點
C. 答題技巧
D. 有咩內容、史實常用
．
最後同寫筆記果篇一樣戴返頭盔，所謂條條大路就通羅馬，溫習方法都唔止一種。依個只係一個過氣考完DSE幾年嘅老屎忽分享，如能為你帶嚟少少建議，咁就太好啦～
．
關於History問題，歡迎隨時喺Q&A session提出，識答一定答！
コメント