Q: 你由幾時開始鍾意Hist? 😃
．
A: 竟然有個唔關歷史考試嘅問題，實在太有趣了～始終自己唔係啲咩有影響力嘅人，講個人經歷出嚟都唔知有冇人想知，嘻嘻。
．
其實我嘅故事唔特別，甚至可以話有啲老土。本身唔係啲咩精英班學生，中一中二成績差到唔敢睇，前排搵返中二份中史大考卷得38分（講緊100分係滿分）。日日都係返學等放學，放學飲可樂。日頭果陣搵周公，夜晚果陣搵信長（無玩過11.2B係你嘅損失）。咁嘅生活都咪話唔開心，起碼日日都有班朋友一齊玩一齊笑。
．
如是者去到中三，又係時候揀科。沉迷喺網路世界鬼知有咩科揀咩，記得開學頭已經要填份意向表，見隔離果個寫化學物理，就照樣喺自己張表到寫化學物理。事後諗返都幾神奇，基本上我係唔識計數（成日比人笑我六六三十六，三十六除六等於六），當年真係讀化學物理嘅話完全想像唔到2017年嘅今日我會做緊咩。
．
開頭講咗我個故事係有啲老土，原因係我當時太過鍾意吸引人注意，上堂太多嘢講又犯埋啲弱智校規（跳咗上朋友個身到叫佢「咩」我，點知有老師經過以為我哋隻揪…），終於比班主任（後來嘅歷史老師）捉咗去傾偈。講過嘅話實太多，傾咗啲乜唔喺到講啦。啲心靈雞湯好鍾意話生命影響生命，每個人走入你生命都係有原因，我剩係相信教學相長 — 當你擺個心出嚟學生係感受到，或者依啲就係知性教育。
．
就係咁中四開始讀雙史，更加希望喺依兩科拎到好成績 — 我係個極度膚淺嘅人，即係第一次測驗高分老師貼貼紙，會為咗繼續拎貼紙而搏命讀書，所以當年中四就搵補習確立目標係5**啦。
．
講住咁多先啦，想知再講～
Comments